Bara forleikur WI 4

Leið nr. 1 á yfirlitsmynd.

85m WI4

Fyrri spönn hefst á 10-15 metrum af WI4, en verður svo WI3. Það er nóg um góða stansa eftir að fyrsta haftinu sleppir.  Það má því skipta leiðinni upp eins og klifrurum sýnist en við tókum hana í 50m og svo 35m spönn af WI3. Leiðin er sérstaklega heppileg þegar klifrarar eru á sitthvoru getustiginu, þannig getur annað fengið góða skemmtun af því að leiða upphafið, síðan getur hin(n) reynsluminni tekið restina.

Síga þarf niður úr leiðinni á V-þræðingum.

Þessi leið hefur ekki verið skráð áður þannig að við gefum henni nafn og gráðu. Nafnið er talið lýsa leiðinni vel þar sem hún hefst á mjög spennandi hreyfingum en svo gerist ekkert frásagnarvert eftir það. Farin af Ágústi Kristjáni Steinarrssyni og Halldóri Fannari 21. janúar 2024.

 

Klifursvæði Hvalfjörður
Svæði Litlasandsdalur
Tegund Ice Climbing

Sigurjón

Svæðið er merkt A á yfirlitsmyndinni. Um aðkomu má lesa á yfirlitssíðunni um Hvalfjörð.

„Sigurjón“ er beint fyrir neðan fjölda tjarna og því líklegt að hann komist fljótt í aðstæður og endist lengi. Sökum nálægðar við sjó er sjaldnast of kalt og brimið skapar kósíheit. Hafa ber þó í huga að gönguleiðin er illfær á flóði en auðvelt er að klifra upp úr sektornum á aflíðandi ís sem fær líklega WI2 gráðu.

Á þessu svæði er möguleiki á að frumfara þó nokkrar leiðir. Sumar þeirra yfir 20 metra langar. Erfiðleikagráðan er líklega frá WI2 upp í WI4+/5.  Mælt er með því að nota línur úr laginu um „Sigurjón digra“ til að nefna nýjar leiðir, t.d. „Komnir til að sjá og sigra“, „Með krafta í kögglum“ og „Takið af ykkur skóna!“

  1. Ófarin
  2. Ófarin
  3. Bóna, bóna, bóna (WI3-)
  4. Og bóna (WI3)
  5. Ófarin (einfaldast að síga niður um þessa leið)
  6. Með ballskó í bögglum (WI3+)
  7. Ófarin
  8. Ófarin
  9. Ófarin
  10. Ófarin

Eins og sést á mynd þá safnast ís fyrir ofan og mætti því setja upp akkeri þar til að síga niður í sektorinn þar sem hann er mest aflíðandi.

Digri WI 3

Svæðið er merkt B á yfirlitsmyndinni. Það er samfelldur 100m breiður ísveggur sem fékk því heitið „Digri“. Um aðkomu má lesa á yfirlitssíðunni um Hvalfjörð.

„Digri“ er beint fyrir neðan fjölda tjarna og því líklegt að hann komist fljótt í aðstæður og endist lengi. Sökum nálægðar við sjó er sjaldnast of kalt og brimið skapar kósíheit.

Hæðin er um 20 metrar og erfiðleikinn á bilinu 3 til 4 eftir því hvar er klifrað. Frábær staður til að æfinga og skemmtunar.

FF. Ágúst Kristján Steinarrsson og Halldór Fannar  10. desember 2023

Klifursvæði Hvalfjörður
Svæði Hvalfjarðareyri
Tegund Ice Climbing

Gin Glyms WI 5

Veturinn 2023 var óvenju kaldur;  á suðvesturhorninu var talað um kaldasta veturinn í hundrað ár. Þetta skapaði einstakar aðstæður í Glymsgili og þá sérstaklega fyrir vatnsfallið Glym. Þann 17. janúar héldu íslendingur búsettur á ítalíu og ítali búsettur á Íslandi inn gilið, með það að markmiði að klifra eina af mörgum sögufrægum leiðum innst í gilinu. Það fór hins vegar á annan veg. Sökum einstakra aðstæðna og ruglingslegra teikninga þá klifruðu þeir nýja leið. Á meðan klifrinu stóð töldu þeir sig vera á Sacrifice (WI5+) eða tilbreytingu við Draumaleiðina (WI5+) en síðar kom í ljós að um hvorugt var að ræða.

Fyrri helmingur leiðar liggur beint up í „gin“ Glyms – þar sem flæði vatns er sterkast og fossinn er venjulega opinn og vatnið spýtist úr honum eins og úr gapandi munni.  Leiðin Sacrifice er á vinstri hönd og Draumaleiðin er töluvert til hægri (hún endar á suðurbarmi gilsins). Þessi fyrri partur innihélt heila spönn af yfirhangandi blómkálshausum sem gerði tryggingar nokkuð snúnar og klifrið krefjandi þar sem hver þrívíddarþrautin tók við af annarri. Það má segja að ísmyndanir á þessum hluti hafi minnt á stórar skattar tennur í jötni, sem er afar viðeigandi. Á seinni helmingi leiðar þurfti að hliðra til hægri þar sem fossin var ennþá opinn í efri hlutanum. Nafnið „Gin Glyms“ þykir því lýsa leiðinni nokkuð vel, það er stuðlað sem er vinsæll siður í íslenskri tungu, og svo má vera að áhugi klifrara á Gin&Tonic hafi spilað eitthvað inn í.

Lesa meira

Klifursvæði Glymsgil
Tegund Ice Climbing

Myndbönd

Ísbað WI 4+

Leiðin er sú fyrsta sem blasir við þegar komið er niður í flæðarmálið eftir lækjafarveginum (sjá myndir). Hún er janframt fyrsta leiðin sem var klifruð á þessu svæði.

Það er torvelt að komast meðfram flæðarmálinu lengra en á fyrsta svæðið sökum öldugangs. Sjávarhæð spilar hér auðvitað inn í en þegar við sóttum þessa hamra heim þá gekk sjór alveg upp að ísnum og vorum við í raun heppnir að komast upp á íssylluna áður en stærstu öldurnar gengu yfir. Þessi sylla var eins og svalir úr ís þar sem sjórinn gekk undir þær þegar hann hamaðist sem mest.

Leiðin var nefnd “Ísbað” sökum þess að seinni spönnin er í raun feitt ískerti sem myndast úr miklum ísúða.  Sá úði var ennþá í fullum gangi þegar við klifruðum og gerði verkefnið meira krefjandi.

Spönn 1: Um 30 metrar WI3+, ýmsir möguleikar til að setja upp akkeri en gætið að ísmyndunum fyrir ofan ykkur. Við völdum einn skásta staðinn með þetta fyrir augum en hann mun seint kallast hættulaus.

Spönn 2: Um 12 metrar WI4+/5, byrjar á hliðrun til hægri en svo er einfaldlega farið beint upp, þar sem kertið er brattast en líka með besta ísinn. Vegna ísbaðsins er best að klifra þetta hratt og fumlaust. 

FF. Halldór Fannar og Ágúst Kristján Steinarrsson 17. mars 2023

Klifursvæði Tröllaskagi
Svæði Klif - Svali sektor
Tegund Ice Climbing

Ljósbláa leiðin WI 4+

Leiðin hefst rétt til vinstri við „Bláu leiðina“ en byrjar á hliðrun til vinstri og svo er þrykkt lóðrétt upp 10m (WI4+) kafla af ís (sem getur verið þakinn þunnu snjólagi).  Eftir það er hliðrað lengra til vinstri og sett upp akkeri. Þarna er góð sylla til að standa á og hefst leiðin „Kiddi“ á vinstri hönd. En í stað þess að halda þangað er farið aftur til hægri og svo beint upp 20m (WI4+) kafla sem er að mestu lóðréttur á góðum bláum ís.  Eftir það eru um 30m (WI3+) þar sem skiptist á ís og snjór.  Í frumferð var gerð v-þræðing undir klettinum í góðum ís og sigið niður á tveimur 60m reipum. Það var mikill snjóhengja fyrir ofan en kletturinn veitti sálrænt skjól.

60m

FF: Halldór Fannar og Ágúst Kristján Steinarrsson, 17. feb. 2022

Klifursvæði Brattabrekka
Svæði Austurárdalur
Tegund Ice Climbing

Myndbönd