Fundargerð eftir Tindfjallafund
Skrifað af: Skarphéðinn Halldórsson Fimmtudagur, 06. desember 2007 09:05
mynd: Ísalp
Fundargerð
Opinn félagafundur um málefni Tindfjallaskála, 5. desember 2007
Fundur var boðaður um málefni Tindfjallaskála fyrir tveimur vikum til að ræða þær áætlanir stjórnar Ísalp að selja skálann Ferðafélagi Ísalnds (FÍ) með þeim skilmálum að það geri skálann upp í upprunalegri mynd og að félagar í Ísalp hafi áfram óheft aðgengi að skálanum.
Stjórn Ísalp kynnti tillögu sína og sat fyrir svörum.
Fundur hefst 20:10
Freyr Ingi Björnsson (FIB) bauð gesti velkomna og kynnti Halldór Kvaran (HK) sem fundastjóra. Þvínæst kynntu allir meðlimir í stjórn sig fyrir fundargestum, nema Ágúst gjaldkeri sem var fjarverandi.
Fyrstur tekur til máls Viðar Helgason(VH), stjórnarmaður í Ísalp og formaður skálanefndar.
Hann hefur skoðað bæði Bratta og Tindjallaskála með smiðsaugum. Rakti stuttlega sögu Tindfjallaskála, byggingarár og helstu stórviðgerðir. Benti á að skálinn sé orðinn gamall og lúinn og þarfnist því aukins viðhalds. Æ færri séu hinsvegar tilbúnir að taka það verk að sér. Benti á að Bratti sé svo gott sem ónýtur, það svari aldrei kostnaði að gera skálann upp. VH gerði einnig grein fyrir skilyrðum stjórnar Ísalp fyrir sölunni; að skálanum verði viðhaldið í sinni upprunalegu mynd og að aðkoma og aðgengi félaga í Ísalp verði tryggt. Að lokkum hnykkti hann á því að “salan snýst ekki um peninga, heldur að tryggja viðhald og virðingu skálans, og áframhaldandi aðgengi félaga”.
Sveinborg Hlíf Gunnarsdóttir (SHG) sýndi myndir sem teknar voru í Tindfjallaskálanum um síðustu helgi. Þar gaf að lít bágt ástand skálans, klæðning hafði fokið af hluta hans. Óþéttur gluggi olli því að snjór fauk inn, auk þess sem snjór átti greiða leið inn á fleiri stöðum. Við þetta tækifæri röktu nokkrir ferðir sínar uppeftir undanfarnar vikur og hvernig skemmdir hafa orðið á skálanum upp á síðkastið. Sveinborg kynnti einnig skýrslu frá 2003 um nauðsynlegar endurbætur á skálanum. Skýrslan liggur á netinu (http://www.isalp.is/art.php?f=73). Margir gripu inn í og lýstu stórum og smáum viðgerðum í gegnum tíðina. Fundarstjóri greip í taumana og kom skikki á menn.
Hálfdán Ágústson lýsti aðkomu sinni að skálanum undanfarna 3 vetur og hvernig ástandið færi smá versnandi með hverri ferð.
Hér opnar fundarstjóri fyrir formlegar fyrirspurnir til stjórnar.
Magnús Hallgrímsson (MH) spyr hvað gert hafi verið við þá styrki sem fengnir hafi verið undanfarin ár út á skálann (300 þús kr frá FÍ og 150 þús kr frá húsafriðunarnefnd).
FIB svarar að FÍ styrkurinn hafi aðeins verið notaður að hluta til, 70 þús kr fyrir nýjum dýnum.
MH spyr þá hvað verði um þessa styrki ef af sölunni verður.
FIB svarar að réttast sé að FÍ sé boðið að taka við afgangnum hafi þeir áhuga á því. Þeir hafi hinsvegar ekki minnst á það í fyrri samræðum.
MH spyr þá um styrkinn frá húsafriðunarnefnd.
FIB svarar að hann viti ekki hvort sá styrkur hafi verið greiddur.
Hallgrímur Magnússon (HM) svarar spurningunni einnig og segir að húsafriðunarnefnd borgi svona styrki eftirá, eftir að búið er að skrifa skýrslu og kaupa efni.
Bárður Árnason (BÁ) segir að skýrsla og kostnaðaráætlun hafi verið send húsafriðunarnefnd á sínum tíma.
MH tekur fram og les erindi sem hann sendi stjórn Ísalp fyrir viku: “TINDFJALLASKKÁLI VAR FRÁ UPPHAFI FERÐAFÉLAGSKÁLI ÞVÍ FJALLAMENN VORU DEILD Í FERÐAFÉLAINU. ÉG LEGG ÞVÍ TIL AÐ SKÁLINN VERÐI AFHENTUR FERÐAFÉLAGINU ÁN ENDURGJALDS OG ÍSALP SÆKI UM DEILDARAÐILD. SKÁLINN VAR BYGGÐUR Á FIMMTA ÁRATUGNUM. ÞÖRF VÆRI AÐ FRIÐA HANN OG VARÐVEITA Í UPPRUNALEGRI MYND.”
Karl Ingólfsson (KI) tekur undir orð MH og rekur hugleiðingar sínar um inngöngu Ísalp í FÍ. Spyr hvort ekki sé í því styrkur fyrir Ísalp, enda séum við með því að fylgja í fótspor alpaklúbba á meginlandi Evrópu.
VH svarar að pælingin sé í sjálfu sér athyglisverð sem varðar klúbbinn allan. Ákvörðun um inngöngu í FÍ verði þó hvorki tekin hér né á næsta aðalfundi. Varðveisla Tindfjallaskála sé hinsvegar akút verkefni sem brýnt sé að leysa sem allra fyrst.
SHG svarar einnig að engar kvaðir fylgi hugsanlegri greiðslu frá FÍ. Aftur á móti hafi þeir lýst sig fúsa til frekari samstarfs við Ísalp í framhaldinu.
Valgeir Ægir Ingólfsson (VÆI) tekur til máls, sver af sér skyldleika við Karl Ingólfsson. Hann spyr um virkni núverandi skálanefndar og hvort boðaðar hafi verið vinnuferðir. Jafnframt býður hann fram krafta sýna í að bjarga skálanum frá bráðri eyðileggingu.
VH svarar að síðasta stjórn hafi með veikum mætti reynt að brýna menn til góðra verka, þeir séu einfaldlega of fáir sem eru tilbúnir að leggja e-ð af mörkum. Það hafi gerst áður að stemming fyrir skálunum vakni, bráðabirgða viðhald er framkvæmt en svo fjari alltaf undan áhuganum. Skálinn þarnfist aftur á móti stöðugs viðhalds og þoli ekki bylgjukenndan áhuga félagsstarfsins.
Guttormur Þórarinsson (GÞ) kynnir sögu sína og sína viðveru í skálanefnd. Einnig rekur hann þær endurbætur sem orðið hafa á skálanum í grófum dráttum í gegnum tíðina. Hann segist hafa eytt miklum tíma og fé í skálann á sínum tíma. Þrátt fyrir það sé skálinn nú að grotna niður. Hann þakkar fyrir fundinn og umræðuna. Að lokum lýsir hann yfir fullum stuðningi við tillögu MH um að Ísalp afhendi FÍ skálann endurgjaldslaust og að klúbburinn gangi sjálfur í FÍ.
Kristín Marta Hákonardóttir (KMH) lýsir þeirri skoðun sinni að það sé eðli félagasamtaka að mikil vinna leggist á fárra herðar og rekur sögu Klifurfélags Reykjavíkur máli sínu til stuðnings. Hún spyr hvort Ísalp geti ekki sjálft sett fé í endurbyggingu skálans og skapað sjálfu sér þannig meiri verðmæti.
Hermann Valsson (HV) tekur til máls. Hann rekur hugrenningar sínar um að ef Ísalp gangi í FÍ verður það banabiti klúbbsins, hann sé dæmdur til þess að koðna niður innan FÍ. Lýsir þeirri skoðun sinni að Tindfjallaskáli eigi að vera vera sameiningartákn klúbbsins og höfuðvígi. Að lokum býður hann fram vinnu sína við uppbyggingu skálans.
KI tekur aftur til máls. Lýsir því yfir að bráðabirgðaviðgerð á skálanum sé þörf og býður fram aðstoð sína við það um næstu helgi. Biður menn um að velta því fyrir sér hvað fjallaskáli þýði nú til dags. Ef félagið vill eiga skálann áfram verði hann að vera lokað hús fyrir meðlimi klúbbsins og menn geti leigt skálann í heild sinni en ekki einstök svefnpláss. Dagar sæluhússins sem stendur öllum opið séu einfaldlega liðnir.
VH svarar að menn verða þá að gera það upp við sig hvað menn vilja fá fram með rekstri Ísalp, lýsir jafnframt þeirri skoðun sinni að réttara sé að einfalda reksturinn.
Guðmundur Jóhannesson tekur til máls. Lýsir þeirri skoðun sinni að það skipti ekki máli hver rekur skálann svo lengi sem félagar hafi óheftan aðgang að honum. Varpar fram þeirri spurningu hvort ekki sé hægt að koma eignarhaldi og rekstri skálans í hendur nokkurra félaga í klúbbnum.
SHG svarar að það sé stefna stjórnar að láta skálann ekki í hendur einkaaðila, þar sem mun erfiðara sé að tryggja aðgengi Ísalp að skálanum þegar fram líða stundir. Þess vegna sé stefnt að því að koma honum í hendur FÍ.
HM tekur til máls. Leggur áherslu á þá miklu vinnu og það mikla fjármagn sem þarf til að viðhalda skála á svæði sem Tindfjöllum. Hann vill sjá skálann áfram á sama stað í núverandi mynd. Hann styður tillögur stjórnar um að koma skálanum í hendur FÍ.
Sævar Skaftason (SS) kynnti sig, mættur á sinn fyrsta fund hjá Ísalp eftir að hafa verið í klúbbnum í mörg ár. Segir frá ahuga nokkurra gamalla félaga til að eignast skálann og reka. Segir að þó að menn hafi í upphafi verið fullir eldmóðs hafi hann fljótlega farið að fá áhyggjur af kostnaði og vinnu sem fylgir slíkum rekstri. Segir einnig frá því kerfi sem notað er um rekstur stærri skála í Ölpunum. Þar eiga klúbbar ennþá húsin en þau séu leigð til rekstrarfélaga. Hann segist þekkja innviði FÍ vel og þá erfiðleika sem þeir eiga við rekstur eigin húsa. Spyr að lokum hvort ekki sé hægt að efla Ísalp til muna til að fá breiðari tekjugrundvöll.
Brynja Magnúsdóttir tekur til máls. Kveðst bera sterkar taugar til skálans og svæðisins. Leggur áherslu á ábyrgð Ísalp í varðveislu svæðisins. Spyr hvort hægt sé að tryggja að FÍ fari ekki í uppbyggingu og stækkun á skálanum eða veglagningu á svæðinu. Einnig spyr hún hvers vegna eingöngu sé rætt um FÍ í sambandi við skálann, ekki önnur félagasamtök.
FIB svarar að ekkert bendi til þess að FÍ hyggi á uppbyggingu á svæðinu, enda segjast þeir vilja viðhalda skálanum í upprunalegri mynd.
VH svarar að FÍ standi Ísalp næst, það sé beinlínis í lögum klúbbsins að FÍ skulu hljóta eigur þess verði klúbburinn lagður niður.
Bárður Árnason tekur til máls. Rekur aðkomu sína að skálanum. Fyrir nokkrum árum hafi hópur manna haft áhuga á miklum viðgerðum og endurbótum. Þá hafi ekki fengist fé í verkið. Nú virðist vera til fé en enginn hefur tíma til að sinna skálanum. Að lokum spyr hann hver innkoma skálagjalda hafi verið undanfarin ár.
GÞ svarar því til að lítil ásókn hafi verið í skálann, þó hafi gengið betur að innheimta skálagjöld eftir að farið var að læsa skálanum.
KI vill taka fram að skálainn hafi ekki verið fjárhagslegur baggi á félagiu undanfarin ár, enda hafi ekki krónu verið eytt í hann.
SS spyr hvort tryggt sé að FÍ leggi fé í vigerðir og viðhald skálans.
FIB svarar að það hafi ekki verið meitlað í stein nei. Hinsvegar sé það þeirra yfirlýst ástæða með kaupunum að koma skálanum í viðunandi ástand.
MH les bréf frá fyrsta formanni Ísalp, hvar fram kemur að það sé gleðiefni ef skálinn kemst í hendur FÍ. Hann viðrar einnig þá skoðun sína að Ísalp sé ekki of lítið til að reka skálann, heldur of stórt.
GÞ tekur aftur til máls. Talar um skilgreiningu á upprunalegri mynd. Rekur sögu smíðinnar, hvaða efni voru notuð til að verja skálann að utan og innan. Tekur fram að upprunaleg mynd skálans hafi breyst í gegnum tíðina. Víkur máli sínu að tengslum FÍ og Ísalp og brýnir fyrri orð sín að Ísalp gangi í FÍ með bæði Tindfjallaskála og Bratta í heimamund.
MH neitar að viðurkenna þá yfirlýsingu GÞ að “trétex” hafi nokkurntíman verið notað til að fúaverja skálann.
Halldór Kvaran fundarstjóri lokar umræðum. Hann bendir á að Ísalp eigi tvo skála sem séu að hruni komnir. Mönnum sé að sjálfsögðu frjálst að hefja skipulaggningu á endurbyggingu þeirra, fram að næsta aðalfundi, þegar kosið verður um tillögu stjórnar um söluna. Dregur möguleikana í stöðunni saman í “gera e-ð, gera ekkert eða gera e-ð annað!”
VÆI boðar til vinnuferðar um helgina. KI, BÁ og GÞ sammælast honum um að fara uppeftir um helgina að sinna bráðaviðhaldi.
FIB þakkar fundargestum fyrir komuna og slítur fundinum klukkan 21:30.
26 skráðir í gestabók að fundi loknum, stjórn með talin.
Skarphéðinn Halldórsson - ritari