Ísklifurfestival 2012

Skrifað af: Arnar Jónsson Miðvikudagur, 28. desember 2011 13:07

Ísklifurfestivalið 2012 verður haldið 11-12 febrúar á komandi ári. Stjórnin hefur ákveðið tvo staði, Bíldudal eða Reyðarfjörð, en ætlar að láta það í hendur meðlima að kjósa um endanlegan áfangastað.

Svæðið í kringum Bíldudal þekkja Ísalparar eftir stórskemmtilegt festival sem við héldum þar 2009. Þá voru í kringum 30 leiðir frumfarnar á svæðinu af öllum erfiðleikagráðum sem var einungis örlítið brot af því sem í boði er á svæðinu einhver skaut á að eflaust væri um 80% leiðanna enn ófarnar. Eitt er víst að þeir sem voru viðstaddir seinustu heimsókn á Bíldudal eru enn að láta sig dreyma um allar þær girnilegu leiðir sem bíða þess að vera klifraðar.

Á austfjörðum er fullt af óspjölluðum ís og leynist hann á ýmsum svæðum víðsvegar um firðina. Einhverjir Ísalparar hafa farið til Reyðarfjarðar og Seyðisfjarðar á liðnum árum og á nógu er að taka á þessum stöðum. Einnig var haldið festival í Breiðdalnum fyrir ekki svo löngu þar sem góð stemming var.

Því hefur verið komið upp könnun hér á vefnum þar sem innskáðir félagsmenn geta kosið. Sá áfangastaður sem fær flest atkvæði verður vettvangur ísklifurfestivalsins en hinn verður hafður til vara. Kosning stendur yfir dagana 28 desember til  4 janúar og hvetjum við alla til að taka þátt.

P.S. Ef einhverjir skyldu eiga í vandræðum með að kjósa þá geta þeir sent tölvupóst á stjórnina með sínu atkvæði.