Forum Replies Created
-
Posts
-
Föstudagur 25 jan. 2013 kl:13:00
Hér er stafalogn, talsvert frost og bjartviðri. Reikna með að færið sé býsna gott þó ég hafi enn ekki stigið á skíðin. Það er lausmjöll ofan á þéttara lagi sem spurningin er hvað heldur vel. Allt féll þetta í gær og nótt.
Snjóflóðaspýjur má sjá hér og hvar eins og búast mátti við.
Kv. Árni Alf.
Update kl: 14:30
Flott færi. Púður ofan á vel heldri skel. Eitt skásta færi vetrar. Vek athygli á að melar og grjót geta verið huldir púðri neðarlega í Fjallinu.
Annars reikna ég með að það verði komin svarta bylur hér skömmu eftir hádegi á morgun. Endilega nýta daginn og tímann vel.
24 jan. kl: 19:00
Það er nægur snjór í Skálafelli og búinn að vera langa lengi. Hittum einmitt fjallaskíðamenn þarna í gær. Núna snjóar þarna og verið er að keyra lyftur fyrir æfingar skíðafélaganna. Þetta er reyndar fyrsti dagur sem lyftur eru keyrðar þarna. Lítur vel út norðan megin líka þó ekki sé hægt að skíða alveg niður að bæjum í Kjósinni.
Kv. Árni Alf.
P.S. Kíkið á vefmyndavélina í Skálafelli. Hún er inni á forsíðu skidasvaedi.is
Fimmtudagur 24 jan kl. 16:00
Stöðug austan átt hefur verið að gera okkur brjálaða hér undanfarið. Höfum opnað og haft opið í strekkingi með vindhraða vel yfir 20 m/s uppi á Fjalli. Reyndar lítill tilgangur í slíku og kannski enn minni skynsemi.
Var í Skálafelli í gær. Þar var sól og smá gjóla en vel opnunarfært. Á sama tíma var austan skítvirði í Bláfjöllum og lokað. Skálafellið er hins vegar enn ekki tilbúið, lyftur ekki klárar og ekki má opna fyrr en 1 febrúar (um helgar).
Í Bláfjöllum er núna svarta bylur (að austan) og mokandi snjókoma = snjóflóðahætta. Hins vegar er ágætis spá á morgun og næstu daga. Er að snúast í hægviðri og jafnvel norðanátt sem væri ágæt tilbreyting.
Kv. Árni Alf.
Fimmtudagur 17 jan 2013
Alltaf er kallinn jafn sannspár. Varaði við bullandi snjóflóðahættu á þriðjudag. Svo les maður þetta í hádeginu í dag:
http://www.visir.is/sersveitin-gekk-fram-a-nyfallid-snjoflod-vid-aefingar/article/2013130119192
Þannig hefur flóðið líklegast fallið á þriðjudeginum 300 metrum norðan Framskálans í Eldborgargili. Þetta er öll fjallshlíðin á 400 m kafla. Býsna myndarleg snjóflóðatunga. Bæði þykk og þung. Náði nú ekki að skoða þetta almennilega en 3 metra snjóflóðastöng náði hvergi niður í tungunni.
Það er svo sem við það sama hér. Snjóar og rignir til skiptis í hvassri austan átt. Sama spá fyrir næstu daga. Frost eftir helgi.
Kv. Árni Alf.
P.S. Fór eitthvað að hugleiða ef þarna hefði verið fullt af skólakrökkum í gistingu. Þau eru vön að þvælast um allt án tillits til veðurs eða aðstæðna.
Í fyrra féll snjóflóð stórt flóð 300 metrum sunnan við skálann. Reyndar fyllti það flóð hálfa skíðabrekkuna. Það er því deginum ljósara að snjóflóð eru eitthvað til að hafa áhyggjur af á svæðinu. Hvort sem það er opið eða lokað.
Þriðjudagur 15 jan 2013
Gott mál þetta með myndavélina í Skálafelli. Annars snjóaði mjög mikið hér í Bláfjöllum í nótt og fram að hádegi í mjög hvassri austan átt. Um hádegi breyttist þetta í grenjandi rigningu, slagviðri.
Hafði alltaf óskaplega gaman af slagveðursdögum í sveitinni í gamla daga. Í lopapeysu og gúmmígalla leið manni alltaf vel. Vatnavextir og vesen var og er alltaf gaman.
Fékk svona svipaðan fíling í dag. Reyndar búinn vinnuflotgalla hefur maður svifið hér um og skoðað aðstæður.
Hér er eðlilega bullandi snjóflóðahætta og best að vera sem minnst á ferli í Fjallinu.
Kv. Árni Alf.
Mánudagur 14 jan. 2013 kl: 17:00
Gátum ekki annað en opnað í dag. Gullfallegt veður í morgun. Byrjaði að hvessa að austan strax um hádegi og það bætir hægt og rólega í. Kóf á Öxlinni en í lagi þar fyrir neðan. Það er bara spurning um tíma hvenær við þurfum að loka.
Kv. Árni Alf.
Update kl: 21:00
Lokuðum ca. kl. sjö. Núna er veðrið orðið ansi skrautlegt og verður mega skrautlegt í nótt og fyrramálið. Best að fara að huga að heimferð.
Sunnudagur 13. jan. 2013
Kallinn hafði rétt fyrir sér eða kannski gekk spáin bara eftir! Það snjóaði a.m.k. ágætu púðri í nótt og morgun þannig að færið varð alveg þokkalegt. Skást var þetta þetta í “troðnum” brautum sem ekki voru troðnar í morgun. Utanbrauta var þetta svona upp og niður. Vel heppnaður dagur og aðsókn góð. Snjókoma fyrri patrinn en bjartviðri þann seinni.
Enn eitt austan hrakviðrið virðist í uppsiglingu á morgun, vonandi með sem mestum snjó. Í kjölfarið hlýnar eitthvað en ekkert til að hafa áhyggjur af. Makalaust að fá ekki að hafa þokkalegt færi í friði í nokkra daga.
Væri Skálafellið í gangi þá væru komnir a.m.k. helmingi fleiri opnunardagar SV lands það sem af er vetri. Sennilega vanáætlað ef eitthvað er.
Kv. Árni Alf.
Laugard. 12 jan. 2013 kl: 12:00
Höfum verið að opna undanfarna daga í bleytu og hita. Hins vegar hefur háttað þannig til að þegar líður á daginn hefur frosið og snjóað duglega ofan á skelina. Þannig hefur fengist skíðanlegt utanbrautarfæri, jafnvel þokkalegt. Ágætis færi í brautum þegar stöðugt snjóar.
Í dag er þetta eitthvað svipað. Fór að frysta og snjóa í morgun eftir bleytu gærdagsins. Hins vegar býsna þungt utan brauta enn sem komið er. Sjáum hvað gerist með frostinu. Hér skyggni lítið og snjóblinda. Gæti birt þegar líður á daginn. Snjóar líklega duglega í nótt og fyrramálið. Vonum það besta.
Kv. Árni Alf.
Sá pólitíski rétttrúnaður ríkti a.m.k. frá 1980 og til 1990 að fjallaskíði væru það eina rétta. Sjálfur átti ég meira að segja fjallaskíði á tímabili til að vera gjaldgengur í útköll.
Gönguskíði voru talin úreltur búnaður því vélsleðar höfðu leyst þau af hólmi. Það gekk meir að segja svo langt að í útkalli 1984 að gönguskíðunum mínum var grýtt út úr snjóbílnum, með tilheyrandi fúkyrðum, þannig að annað týndist. Ég varð skíðalaus í miðju útkalli. Fjallaskíði skildu búnaðurinn vera og heita. Menn voru mjög trúaðir í þá daga.
Það er 1990 sem ég birti fyrstu greinina í Hjálparsveitatíðindum og svo aðra í Mogganum 1992 um óþekkta skíðatækni, telemarkið. Hvernig sem á því stóð þá hurfu fjallaskíðin á merkilega stuttum tíma og telemarkið tók við.
Kv. Árni Alf.
Laugard. 29 des. 2012
Ekki á hverjum degi sem það þarf að hanga á eftir veghefli til að komast í Fjöllin. Svo var þó núna í hádeginu. Man ekki oft eftir jafn miklum nýföllnum snjó á svæðinu og þá sérstaklega á veginum. Upp í klof og sums staðar gott betur. Girðingar víðast á kafi.
Þrátt fyrir snjóblindu mátti víða sjá snjóflóð í hlíðum. Mörg hver nýfallin.
Vonum að eitthvað verði eftir af þessum snjó eftir norðan áhlaupið.
Kv. Árni Alf.
Föstudagur 28 des. 2012
Jæja. Nú hyllir undir að desember og árið renni sitt skeið. Búin að vera ansi skrautleg og umhleypingasöm tíð undanfarið og opnanir strjálar. Ekki hefur vantað snjóinn svo mikið er víst.
Það gerði smá hita og bleytu fyrir jól en svo fraus þetta í hálfgerðan ísklump. Nú í dag hefur snjóað verulega mikið og skafið duglega af austri. Það má því reikna með talsverðri snjóflóðahættu.
Vonum að þessari ótíð fari nú senn að ljúka.
Kv. Árni Alf.
Þriðjudagur 18 des kl 11:00
Mögnuð sólarupprás við Surtsey. Skyggni með afbrigðum gott. Hér er svo sem allt við það sama. Harðfenni utan sem innan brauta. Kannski ekkert óskaplega spennandi skíðalega séð. Göngufærið er hins vegar geggjað.
Þetta er annar froststilludagurinn. En blikur eru á lofti. Á morgun er spáð austan hvassviðri. Mæli með að menn nýti daginn vel.
Kv. Árni Alf.
Sunnudagur 9 des 2012
Snjóaði slatta og skóf duglega í austan átt fyrri hluta föstudags,ringdi dálítið ofan í það og fraus svo um kvöldið. Í gær var hvass útsynningur (SV átt) með éljum. Í nótt var hvöss austan átt sem nú er gengin niður í bili.
Það er því talsvert harðfenni og glerjað utan brauta. Smá laus snjór í vestur og norðurhlíðum. Ekkert sérstaklega spennandi utanbrautarfæri.
Þokkalegt veður og bjart þessa stundina. Gert ráð fyrir að það hvessi seinni partinn í dag. Skítviðri á morgun og umhleypingar út vikuna ef eitthvað er að marka spána.
En til að ítreka björtu hliðarnar þá er nóg af snjó og meira á leiðinni.
Kv. Árni Alf.
Föstudagur 7. des 2012
Það var áhugavert að skoða ummerkin eftir snjóflóðin í gær. Mjög oft er það þannig að vindur og úrkoma afmá ummerki snjóflóða að hluta eða alveg. Þau hverfa einfaldlega. Ekki er hægt að sjá útlínur flóðanna, þau snjóar í kaf og brotstálið fennir í kaf eða hreinlega skefur burt. Þetta er vandamál sem björgunarfólk getur staðið frammi fyrir. Útlínumerking áður en allt hverfur er kannski mikilvægari en margan grunar.
En aftur að gærdeginum. Neðri hluti flóðanna var sums staðar ógreinilegur. En brotstálið var hins vegar flott. Verð að viðurkenna að ég þorði ekki út á brúnina til að mæla þykktina. Komst hins vegar að þar sem sprunga var í flekanum upp á fjallinu fjær brúninni. Þar er flekinn miklu þynnri en engu að síður 2,5 metrar. Ég reikna með að brotstálið óvísindalega áætlað hafi verið a.m.k. 4 metrar á þykkustu köflunum. Þetta er reyndar þykkast þarna á brúninni og hengjan sjálf kemur inn í.
Þetta er fleki sem rennur á hörðu undirlagi og skilur ekki snjókorn eftir. Ljóst að gríðarlegt efni hefur bæst í skíðabrekkurnar. Ef einhver er að tala um snjóframleiðslu þá er þetta með því afkastameira.
Á Suðursvæðinu þá er sneiðingur sem menn fara um þegar farð er úr tvíburalyftunum. Á köflum þar var allt pakkað í kögglum en annars staðar voru engin ummerki eftir flóð þó þau væru til staðar neðar í brekkunni. Það virðist því sem flóðið eða flekinn hafi svifið þarna yfir. Vel má vera að þetta hafi verið fleiri en eitt flóð. A.m.k. alltaf gaman að spá og spekúlera í snjónum. Hvort það sé eitthvað gáfulegt er allt annað mál.
Kv. Árni Alf.
P.S. Verst er að hafa ekki haft tíma né myndavél til að eiga betur við þetta. Flott mótíf. Hefði örugglega getað fengið einhvern fórnfúsan til að pósa undir brotstálinu.
Fimmtudagur 6 des 2012 kl:11:00
Hér mökk snjóaði og skóf í allan gærdag. Segir sig sjálft í slíkum aðstæðum verður töluverð snjóflóðahætta. Það má segja að allt Fjallið sunnan frá Kóngslyftu og suður að Suðurgili hafi farið af stað og endað langt niðri í skíðaleiðum. Gott að fá þetta í brekkurnar. Austan áttin hefur auljóslega verið óvenju norðanstæð og dágott snjóflóð fallið á óvanalegum stað aleiðis niður í Suðurgil.
Af skíðafæri er það að frétta að reikna má með góðu utanbrautarfæri a.m.k. fyrir bretti. Þetta er reyndar vel vindbarinn fleki. Annars mæli ég með að menn fari varlega. Stærstu hnullungar á svæðinu leyndast þarna undir einhvers staðar.
Og svona til að bókhaldið sé í lagi þá er þetta fyrsti opnunardagur fyrir almenning. Hér er hægviðri, heiðskýrt og um þriggja stiga frost.
Kv. Árni Alf.
Mánud. 3 des 2012
Jæja þá virðist þetta bara komið. Snjóaði þokkalega um helgina og settist í girðingar enda mjög hvasst. Á laugardeginum var hér um tíma rigning í 3 stiga frosti. Mikil ísing á lyftum og vírar sums staðar útaf. Annars verða umhleypingar í vikunni og lítur út fyrir talsverða snjókomu. Nú er unnið hörðum höndum að ryðja úr girðingum og troða brekkur. Kóngsgilið og Suðurgil eru þó ekki skíðafær enda engar girðingar þar.Það er í raun ekki skapleg spá fyrr en næstu helgi. Sjáum hvað setur.
Kv. Árni Alf.
Sunnud. 25 nóv. 2012
Flottur dagur í Fjöllunum. Það á bæði við um færi og veður. Menn voru meir að segja eitthvað að renna sér utanbrauta. Örugglega þrælgott færi fyrir bretti.
Margir á gönguskíðum og líklega enn fleiri bara á snóþotum út um allt í veðurblíðunni.
Annars mæli ég með tunglskíðun í kvöld. Fullt tungl og heiðskýrt. Aldrei að vita með norðurljós. Síðasti séns í bili enda á að þykkna upp strax á morgun.
Umhleypingar í vikunni. Skv. spánni þá verður megabylur stax á miðvikudag.
Vonum að það gangi eftir.
Kv. Árni Alf.
Laugard. 24 nóv. 2012
Í gærkveldi snjóaði og skóf duglega í hvassri austan átt um tíma. Safnaðist vel í girðingar. Í nótt gerði svo blotasnjókomu af hásuðri sem klammaðist ofan á. Í morgun kólnaði svo örlítið með vestan átt og sæmilegri úrkomu fram yfir hádegi.
Það má segja að allar brekkur á Suðursvæðinu séu komnar inn. Norðurleiðin er einnig svo gott sem dottin inn. Ekki væri verra að fá eitt gott skot í viðbót svona til að fullkomna þetta. Þá væri snjóalega séð ekkert því til fyrirstöðu að opna almenningi.
Skv. spánni þá ættu einhver skot að koma seinna í vikunni. Vonum það besta.
Í Kóngsgilinu og Suðurgili sem allajafna voru fyrstu brekkurnar til að detta inn hér áður fyrr er nánast autt. Langt er í að þær skíðaleiðir detti inn. Þar hefur heldur engin landmótun farið fram og engar snjógirðingar eru til staðar.
Án snjógirðinganna væri hvorki verið að keyra toglyftur á Suðursvæði né spá í almenningsopnun. Gott dæmi um hvað smá skammtur af “common sense” hefur breytt miklu í Bláfjöllum.
Kv. Árni Alf.
23 nóv. 2012
Fyrsti dagur sem við keyrum lyftur hér í Fjallinu. Þetta eru reyndar bara tvær toglyftur á Suðursvæði fyrir æfingar. Suðursvæðið er alltaf fyrst til að detta inn nú orðið sem líklega má þakka að það er eina svæðið sem er þokkalega þakið snjógirðingum.
Það er nánast engin snjór á svæðinu en það litla sem er af honum hefur safnast í girðingarnar. Þessu efni er síðan ýtt út í brekkurnar. Opnum fleiri lyftur og brekkur næstu daga. Þetta er því miður of lítill snjór til að opna fyrir almenning. Vegna fáránlega mikillar aðsóknar fyrstu opnunardaga sitjum við í þeirri stöðu að þurfa annaðhvort að opna allt Fjallið eða ekkert.
Kv. Árni Alf.
Ánægjulegt að sjá að enn sé til fólk með sómatilfinningu fyrir náttúrunni sem þorir að tjá sig.
Fyrrverandi og núverandi kauphallardrengir forðast hins vegar sviðsljósið.
Það sem veldur hins vegar miklum vonbrigðum er hvað leiðsögumenn og aðilar í ferðaþjónustu þora lítið að segja sína skoðun.
http://www.isalp.is/forum/5-almennt/13305-trihnjukagigur-enn-i-frettum.html
Kv. Árni Alf.
Snilld hjá Skabba. Kalli tekinn í bólinu þarna vægast sagt. Eða var hann að kasta steini úr glerhýsi?
Hann hefði reyndar getað bjargað sér með því að „stinga hausnum í steininn“ ef einhver hefði „kastað grjóti úr steinhúsi“ eins og Vigdís Hauksdóttir þingmaður Framsóknar orðaði þetta eftirminnilega á hinu hæstvirta Alþingi nú nýlega.
Er Kalli í Framsókn?
Kv. Árni Alf.
Góð grein. En náttúrvernd er ekki það eina sem ég hef áhyggjur af.
Talsvert hefur borið á Birni Ólafssyni sem talsmanni Þríhnjúka ehf.undanfarið. Björn er stofnandi og einn helsti eigandi fyrirtækisins, fyrir þá sem þekkja lítið til.
Varð því fyrir verulegum vonbrigðum þegar ég uppgötvaði nú nýlega að umræddur Björn var einn af stærri hluthöfum og stjórnandi VBS fjárfestingarbanka.
Fjármálafyrirtæki sem skilur eftir sig tugmilljarða skuldir til handa skattborgurum landsins.
Og hvað kemur það málinu við, kann einhver að spyrja.
Þegar einkavæða á náttúruperlu, og hið opinbera er byrjað að ausa fjármunum í ævintýrið þá skiptir máli hverjir þar koma við sögu.
Það er stórt mál þegar afhenda á einkafyrirtæki náttúruna. Leiki einhver vafi á fortíð manna þá ætti náttúran að njóta vafans.
Það er eitthvað stórkostlega bogið við að menn sem skilja eftir tugmilljarða skuldaslóð, sem bitnar beint á samfélaginu, fái náttúruperlur afhentar sjálfkrafa auk þess að fá aðgang að sjóðum almennings.
Ef landinn ætlar einhvern tímann upp úr siðleysinu þá verður að stinga á kýlið, t.a.m. með málefnalegri umræðu.
Ef þetta er allt einhver misskilngur þá endilega leiðréttið mig.
Kv. Árni Alf.
Var að enda við að hlusta á Bylgjufréttir þar sem sagt var frá þessu slysi.
Sagt var frá því að göngumenn sem hafi verið 28 hafi verið “tjóðraðir” saman.
Menn geta verið tjóðraðir niður gegn vilja sínum. Dýr eru kannski tjóðruð við staur og það sjaldnast sjálfviljug.
Voru þetta kannski fangaflutningar?
Kv. Árni Alf.
Tek undir með Kára og hvet menn til að skrifa undir. Auðvitað er það stílbrot fyrir utanbrautarfólk að hugsa um skíðalyftur þessa frábæru skíðavordaga þegar menn vilja vera sem fjærst slíkum mannvirkjum.
Í Mogganum í gær var flott mynd og texti sem tengdist þessu málefni.
Í vikunni var sagt frá því að Reykjavíkurborg hefði lagt 90 milljónir í að bæta stúkuna á fótboltavelli Fylkismanna nú í sumar. Þetta er talsvert meira en Borgin leggur í rekstur skíðasvæðanna á ári. Sennilega svipuð upphæð ef nýframkvæmdir eru teknar með í dæmið. Og hvað eru fótboltafélögin mörg?
Fyrst er auðvitað að koma Skálafelli í fullan rekstur. Samhliða og í kjölfar þess er ekki svo dýrt að setja upp a.m.k. eina lyftu þarna norðan megin. Verður einfaldlega hluti af rekstri Skálafells. Yrði styrkur fyrir utanbrautarskíðun.
Ég er ekki að sjá þá snjóframleiðslu sem þarf sunnan heiða verða að veruleika alveg á næstu árum. Að setja upp lyftu(r) þarna í norðurhlíðinni er stórsniðugur millileikur, líka hundraðfalt ódýrara og þú ert öruggur með snjó. Snjóframleiðsla tryggir nefnilega ekki endilega snjó eins og sýndi sig á norðanverðu landinu í vetur. Og mun enn síður gera það sunnan heiða. Lyftur þarna í norðurhlíðinni eru því sennilega framtíðin.
Hvet til að skrifa undir. Látum sameiginlega sjóði ekki eingöngu fara í fótbolta.
Kv. Árni Alf.
