Reykjavík

Reykjavík er ekki þekkt fyrir ísklifur en þó leynast einhverjar línur hér og þar.

Gufunes

Í frístundarmiðstöðinni í Gufunesi er gamall súrheysturn. Innan í honum eru klifurfestur þar sem að börn geta klifrað. Utan á turninum fékk alpaklúbburinn að koma fyrir úðarakerfi sem lætur vatn leka niður norðurhlið turnsins þegar að frost fer niður fyrir -2°C.

ATH: Eftir að turninn fékk langþráð viðhald og var endurmúraður að utan og gerður fínn, þá var ákveðið að ekki mætti lengur ísklifra á honum og grindin er því ekki uppi og úðarakerfið ekki virkt.

Ef einhver veit um stað á Höfuðborgarsvæðinu sem gæti hýst svipaðan vegg, þá má endilega hafa samband við klúbbinn.

Úlfarsfell

Nokkrar línur eru mögulegar í Úlfarsfelli en lítið er vitað um klifur í fjallinu. Norðurhliðin sem snýr að Mosfellsbæ hefur að geyma allskonar gilskorninga og veggi, suma hverja með ís. Þetta gæti orðið príðis svæði til að skjótast á og brölta aðeins.

Vitað er um eina leið á norðvestur hlið fjallsins, sem snýr að þjóðveginum. Leiðin er alla jafna stutt WI 3 en verður  stundum jafnvel WI 2 eða bara snjóbrekka ef að gilið fyllist af snjó

  1. Skautasvell WI 2

Korputorg

Á Korputorgi kemur vatn út úr bergi á einum stað á bílastæðinu. Veggurinn er um 4-5m hár og myndar þetta byrjendavænar aðstæður til að æfa ísklifur

Höfðatorg

Komið hefur verið fyrir boltum á einum veggjana á Höfðatorgi. Um fjórar leiðir er að ræða

  1. Vinstri leiðin – 5.10a
  2. Hægri leiðin – 5.10c
  3. Byrja á vinstri og enda á hægri – 5.10c
  4. Byrja á hægri og enda á vinstri – 5.10b

Klifurfélag Reykjavíkur hefur fengið leyfi hjá eigendum til þess að mega klifra á veggnum. Eigendur hafa beðið um að nokkrum reglum sé fylgt:

  • Ekki klifra á þeim tíma sem starfsemi er í byggingunni þ.e. 9:00-16:00 á virkum dögum, það truflar vinnufrið á skrifstofum.
  • Ekki klifra á nóttunni þ.e. eftir 00:00.
  • Ekki vera með óþarfa læti eða hávaða.

Map

Comments

Leave a Reply